By JOENALD MEDINA RAYOS
PASADO na sa Committee Level ng Sangguniang Panlalawigan ang panukalang Ordinansa para sa paglalagay ng Street Lights ang lahat ng mga pedestrian crossings sa mga provincial roads sa Lalawigan ng Batangas.
Sa regular na sesyon ng Sangguniang Panlalawigan nitong Lunes, Agosto 19, iniulat ni Board Member Carlo Roman Junjun Rosales ng Unang Distrito ng Batangas, may-akda ng panukalang ordinansa, na sasagutin ng pamahalaang panlalawigan ang paglalagay ng mga naturang pailaw na ilalagay sa magkabilang direk-syon ng nasabing interseksyon sa bawat munisipyo o lungsod, gaya ng naging panukala ni Board Member Bart Blanco ng Ikalimang Distrito.
Hiniling din ni Bokal Blanco kay Bokal Rosales na maisama rin sa mga prayoridad na lalagyann ng streetlights ang mga estratihikong lugar gaya ng pook pamilihan at mga paaralan.
Upang hindi maging pabigat sa mga local government units na nakasasakop sa mga lugar na lalagyan ng naturang pailaw at walang buwanang konsumo sa kuryente na kailangang bayaran ang munisipyo, solar electric lights ang gagamitin para rito.
Magsisimuluang ipatupad ito sa taong 2020 sapagkat sa susunod pang annual budget ng probinsya mapapasama ang kaukulang pondo na kakailanganin para maipatupad ang proyekto.|-BALIKAS Network News
