By JOENALD MEDINA RAYOS
INIULAT ni Mayor Edilberto Ponggos ng bayang ito na isa na naman niyang kababayan ang naitalang nagpositibo sa sakit na corona virus disease (CoVid-19).
Siyam na araw mula ng ideklara ng Aligatag na Covid-Free na ang munisipyo, natanggap nila ang opisyal na resulta ng isinagawang tests sa isang residente ng Brgy. Muzon I.
“Ikinalulungkot ko pong sabihin na siya ang PANG-APAT na nagPOSITIBO thru local transmission dito sa ating bayan. Siya po ay walang naging byahe sa ibang bansa ngunit nagkaroon siya ng exposure sa isang COVID positive sa Lipa Medix Medical Center. Bagama’t nananatiling asymptomatic (walang nakikitang sintomas), sya po ay kasalukuyang naka-admit sa isolation room ng nasabing ospital,” pahayag ni Mayor Ponggos.
Lumabas aniya ang resulta ng kanyang eksaminasyon noong May 3, 2020 ngunit nito lamang Martes, Mayo 5, natanggap ang opisyal na resulta.
Magpapatupad naman ng mga bagong patakaran sa nasasakop ng barangay Muzon I upang mapigil ang lalo pang pagkalat ng sakit sa nasabing bayan. | – BALIKAS News Network
