By JOENALD MEDINA RAYOS
BATANGAS City – PERSONAL na iniabot ng negosyanteng si G. Dennis Uy, may-ari ng Chelsea and Udenna Corporation, kay Governor Hermilando I. Mandanas ang P4-milyong donasyon bilang relief and rehabilitation assistance sa Lalawigan ng Batangas kaugnay ng pagputok ng Bulkang Taal.
Sa kaniyang pagbisita sa Batangas Provincial Sports Complex kung saan nakasentro ang relief operation ng probinsya, Biyernes ng hapon, inihayag ni Uy kay Mandanas ang kanyang seryosong pakikiramay sa matinding kalamidad na puminsala sa kabahayan ng libu-libong residente sa palibot ng Bulkang Taal, at tiniyak ang tulong niyang personal at ng kaniyang mga kumpanya.
Bilang dagdag na ayuda rin, inilunsad ng kaniyang kumpanyang Converge ICT Solutions, Inc. ang Bangon Batangas campaign na maglalatag ang kaniyang fiber optic internet service sa mga command posts ng provincial, city and municipal disaster and risk reduction management offices.
Sinabi naman ni Pampanga governor Dennis Delta Pineda na kung maaari ay hanggang sa mga evacuation centers ay malagyan ng mabilis at reliable na internet service upang mapabilis ang komunikasyon at paghahatid ng mga ayuda sa mga evacuees. Personal na pinamumunuan ni Governor Pineda ang buong Provincial Disaster and Risk Reduction Management (PDDRM) Team ng Lalawigan ng Pampanga na binubuo ng 234 katao na dumating sa Batangas noong Martes ng umaga dala ang may 56 heavy equipments and service vehicles at mga relief goods.| – BALIKAS News Network
