By JOENALD MEDINA RAYOS
BAUAN, Batangas – NAUWI sa maagang pagkasawi ang mag-asawang maaga sanang aalis ng bahay bilang mga negosyante nitong Miyerkules ng madaling-araw, Mayo 30.
Batay sa ulat ni Police Chief Inspector Alfie Salang, hepe ng pulisya sa bayang ito, kay Police Senior Superintendent Edwin A. Quilates, officer-in-charge sa Batangas Police Provincial Office (BPPO), kasasakay pa lamang ng negosyanteng si Rizal Ambat Abante, 61, sa kaniyang L300 FB van na may plakang POI276 bandang alas-4:30 ng medaling-araw at hinihintay ang pagsakay ng kaniyang asawang si Estelita Salcedo Abante, 60, nang tambangan ng di pa nakikilalang salarin.
Nakagarahe pa noon ang nasabing sasakyan sa kanilang tahanan sa Villa Florentina, Brgy. Manhinao Proper, bayang ito.
Matapos ang pamamaril, kaagad na tumalilis palayo ang nasabing suspek dala ang di pa malamang kalibre ng baril na ginamit sa krimen.
Kaagad namang isinugod ng mga sumaklolo ang mag-asawang biktima sa Bauan Doctor General Hospital para sa agarang lunas ngunit idineklara na rin silang dead on arrival ng doktor doon. Patuloy ang imbestiogasyon ng pulisya sa naturang krimen. |#BALIKAS_News
