Aklat 14 Bilang 26
Ika-22 hanggang ika-28 ng Hunyo, 2009
Ordinansa ipinasa para sa mga kasambahay ng lungsod ng Batangas Ulat ni Carvelo Malubag, November 3, 2008
LUNGSOD NG BATANGAS- Matapos ang apat na taon ng mga serye ng konsultasyon
at pag-aaral ay naipasa na rin ng pamahalaang lungsod ang ordinansang
magbibigay proteksyon at kikilala umano sa karapatan ng mga kasambahay.
Ang Ordinance No. 13 series of 2008 na pinamagatang “Domestic
Workers Ordinance of Batangas City,” ay nilagdaan ni Mayor
Eduardo Dimacuha noong ika-27 ng Oktubre.
Layunin nitong maitaguyod ang karapatan ng mga tagaluto, hardinero,
family driver, caregiver, labandera at mga yaya.
“Malaki ang kontribusyon ng mga kasambahay sa lipunan, sila
ang nagsisilbing kaagapay natin sa pamilya, ‘yun nga lamang
ay ‘di sila gaanong narerecognize sa lipunan,” wika ni
Konsehal Nestor Dimacuha, isa sa mga nagsulong ng nabanggit na ordinansa,
sa panayam ng Balikas.
Ayon sa ‘di-pampamahalaang organisasyong Visayan Forum Foundation
Incorporated (VFFI), mula taong 1997 hanggang 2005 ay tinatayang
aabot sa 2,957 ang mga kasambahay na naninilbihan sa lungsod ng
Batangas.
Ayon kay Charelle Pasion, acting Regional Coordinator ng VFFI-Batangas,
dahil aniya sa pagpapatupad ng nasabing ordinansa ay mapoprotektahan
ang mga kasambahay laban sa mga katiwalian.
Kabilang na lamang aniya rito ang pang-aabuso, mababa at naantalang
sahod at ang sekswal na pangmomolestya.
Ngunit kung tutuusin ang nasabing ordinansa aniya ay para na rin
sa proteksyon ng mga employer at mga kasambahay.
Isang halimbawa nito aniya ay nakasaad sa ordinansa na bawat barangay
ng lungsod ay kailangang gumawa ng master list ng mga kasambahay.
Ayon naman kay Pasion sa ganitong pamamaraan ay madali aniya ang
pagtukoy sa impormasyon ng mga kasambahay sa oras na may nangyaring
emerhensiya tulad ng biglaang pag-alis ng walang paalam sa kanilang
mga employer.
Nakapaloob din sa ordinansa na magsasagawa ng agarang pagtugon partikular
sa lebel ng komunidad ukol sa mga inihahaing reklamo ng mga kasambahay
tulad ng pang-aabuso.
Itinatakda rin ng batas ang pagkakaroon ng mga kasambahay ng kontrata
sa kanilang mga magiging amo.
“Magiging maganda ang samahan ng employer at kasambahay kapag
may kontrata silang napagkasunduan” wika ni Konsehal Dimacuha.
Maiiwasan aniya ang mga pang-aabuso lalo na sa sobrang oras at dami
ng tinatrabaho ng mga kasambahay. Kung salat man sila sa pananalapi
ay dapat napapakinabangan nila ang batas,” dagdag pa niya.
Ayon pa rin sa ordinansa dapat rin aniyang palakasin ang sistema
ukol sa pagbibigay ng ligal, pinansyal at sikolohikal na tulong
sa mga kasambahay na minamaltrato.
Kabilang din sa itinatakda nito ay ang iba’t-ibang benepisyo
rin para sa mga kasambahay tulad ng SSS, Philhealth at iba pa.
Ayon kay Konsehal Dimacuha, taong 2006 pa aniya unang ipinanukala
ang ordinansa ngunit natagalan ang implementasyon nito sapagkat
dumaan pa aniya ito sa mga serye ng konsultasyon.
Sinumang mapapatunayang lumabag sa itinatadhana ay maaaring parusahan
sa pagmumulta ng halagang 2 hanggang 5 libong piso o pagkakakulong
ng isang taon depende sa hatol ng korte.
